Matagal, malayo-layo ang nilakbay ng mga tula sa koleksiyon--sangkuwarto ng isang ganap na buhay kung tutuusin. Hindi kataka-takang naikudkod ng makata ang paningin sa hapdi at hingalo ng mga gunitang ano't di mapugto magpahanggang ngayon. Lumaki na ang mga biyas ng musmos na mga tanong, umusbong pa ang pagtataka, kumapal ang paninimdim at paghabol sa pinangulilahang mariposa at kaibigan at mga bagay na nakahulagpos ngunit patuloy na sumusukol sa gunam. Iyon ang sumpa kay Jim Pascual Agustin; iyon din ang marilag niyang mutya.